LÍF MEÐ LYFJUM

 

Málþing í boði SÍBS, þriðjudaginn 22. mars kl. 16:00

í Þjóðmenningarhúsinu við Hverfisgötu.

 

Fjallað verður um reynsluna af breyttri og minni greiðsluþátttöku

ríkisins á lyfjum. Hverju þarf að breyta? Hvað má bæta?

 

 

DAGSKRÁ

Setning

                            Dagný Erna Lárusdóttir, formaður SÍBS.

 

Öndunarfæralyf, sparnaður og lífsgæði.

                            Hjörleifur Þórarinsson lyfjafræðingur.

 

,,Er ríkið okkar gæfusmiður?

                            Salome Arnardóttir, heimilislæknir.

 

Reynslusaga sjúklings.

                            Haraldur Haraldsson.

 

Blóðfitumeðferð, forvarnir og framtíðin.

                            Dr. Karl Andersen, dósent í hjartalækningum.

 

Pallborðsumræður

 

 

Fundarstjóri Guðmundur Bjarnason, formaður Hjartaheilla.

 

Málþingið er öllum opið.

 

 

sibs.is

Samband íslenskra berkla- og brjóstholssjúklinga

innsett F.S.

 

Vilt þú vera trúnaðarmaður fatlaðs fólks?

http://www.obi.is/utgafa/frettir/nr/874

11.3.2011

Öryrkjabandalag Íslands (ÖBÍ) og Landssamtökin Þroskahjálp auglýsa eftir fólki sem er áhugasamt um að sinna verkefnum trúnaðarmanns fatlaðs fólks. Umsóknarfrestur er til 22. mars nk.

Samkvæmt 37. gr. laga um málefni fatlaðs fólks nr. 59/1992 (Opnast í nýjum vafraglugga), skal velferðarráðherra skipa fötluðu fólki trúnaðarmenn eftir tilnefningum frá heildarsamtökum fatlaðs fólks.

Samkvæmt 2. gr. reglugerðar um trúnaðarmenn fatlaðs fólks nr. 172/2011 (Opnast í nýjum vafraglugga) skulu þeir vera átta talsins og skiptast þeir milli landshluta með eftirfarandi hætti:

1. Á þjónustusvæði Reykjavíkur og Seltjarnarness starfi tveir trúnaðarmenn.
2. Kópavogur, Garðabær, Álftanes, Mosfellsbær og Kjós hafi einn trúnaðarmann.
3. Hafnarfjörður og Suðurnes hafi einn trúnaðarmann.
4. Vesturland og Vestfirðir hafi einn trúnaðarmann.
5. Norðurland vestra, Akureyri og Norðurþing hafi einn trúnaðarmann.
6. Austurland og Hornafjörður hafi einn trúnaðarmann.
7. Vestmannaeyjar og Suðurland hafi einn trúnaðarmann.

Helstu verkefni:

Trúnaðarmenn skulu fylgjast með högum fatlaðs fólks og vera því innan handar við réttindagæslu hvers konar. Trúnaðarmaður skal vera sýnilegur í störfum sínum, halda reglulega fundi með fötluðu fólki á sínu svæði og standa fyrir fræðslu fyrir fatlaða einstaklinga og þá sem veita þeim þjónustu. Um frekari verkefni trúnaðarmanna fatlaðs fólks vísast til reglugerðar um trúnaðarmenn fatlaðs fólks nr. 172/2011. (Opnast í nýjum vafraglugga)

Hæfniskröfur:

• Reynsla og þekking á málefnum fatlaðs fólks er nauðsynleg.
• Menntun sem nýtist í starfi er æskileg.
• Leitað er eftir einstaklingum sem eru liprir í mannlegum samskiptum, taka frumkvæði og geta unnið sjálfstætt.

Ráðgert er að skipa trúnaðarmenn til eins árs til að byrja með meðan unnið er að lögum um réttindagæslu fyrir fatlað fólk.

Velferðaráðherra ákvarðar vinnuskyldu og þóknun trúnaðarmanna.

Nánari upplýsingar veita:

Lilja Þorgeirsdóttir framkvæmdastjóri ÖBÍ, sími 530-6700 / 869-0224, netfang [e-mail]

Friðrik Sigurðsson, framkvæmdastjóri Þroskahjálpar, sími 588-9390 / 861-2752, netfang [e-mail] 

Þeir sem hafa áhuga á ofangreindum störfum skili umsóknum, rafrænt á ofangreind netföng fyrir 22. mars merkt Trúnaðarmaður eða bréfleiðis til ÖBÍ, Hátúni 10, 105 Reykjavík eða til Landssamtakanna Þroskahjálpar, Háaleitisbraut 13, 108 Reykjavík.

innsett F.S.          

 

Kjör öryrkja langt undir neysluviðmiðum velferðarráðuneytis

Fréttablaðið, 17. mar. 2011 06:00

 

 

Lilja Þorgeirsdóttir framkvæmdastjóri ÖBÍ

 

Lilja Þorgeirsdóttir skrifar:

 Á blaðamannafundi 7. febrúar sl. kynntu fulltrúar velferðarráðuneytisins ný íslensk neysluviðmið. Gefin var út ítarleg skýrsla unnin af sérfræðingum úr háskólasamfélaginu m.a. með hliðsjón af gögnum Hagstofunnar um neyslu heimila á árunum 2003 til 2008. Fólk er hvatt til að koma með athugasemdir um efni skýrslunnar, sem er á vef ráðuneytisins, fyrir 20. mars nk. Tilgangur neysluviðmiða er að aðstoða fólk við að áætla eigin útgjöld en nýtast þau jafnframt við að finna út lágmarksframfærslu og upphæðir bóta.

 

Öryrkjabandalag Íslands (ÖBÍ) hefur frá upphafi barist fyrir sjálfsögðum réttindum öryrkja til að lifa mannsæmandi lífi óháð því hvort fólk sé fatlað eða með skerta starfsorku vegna veikinda eða annarra ástæðna. Um sjálfsögð mannréttindi er að ræða enda kemur fram í 65. gr. stjórnarskrár Íslands að allir skuli vera jafnir fyrir lögum og njóta mannréttinda óháð efnahag. Þrátt fyrir það eru kjör öryrkja óásættanleg því bætur almannatrygginga eru langt undir neysluviðmiðum velferðarráðuneytisins. Þetta á við um öll viðmiðin óháð því hvort um sé að ræða dæmigert viðmið, sem er leiðbeinandi um hóflega neyslu, grunnviðmið, er varðar lágmarksframfærslu, eða skammtímaviðmið, sem er framfærsla í hámark níu mánuði. Í töflunni hér að neðan má sjá hversu mikið ber á milli þessara viðmiða og örorkubóta sem öryrkjar fá frá Tryggingastofnun ríkisins.

 

Upphæðir í skammtíma- og grunnviðmiðum eru mjög lágar og ljóst að erfitt er að lifa á þeim miðað við aðstæður í þjóðfélaginu, en bætur almannatrygginga eru þó umtalsvert lægri. Það vekur einnig furðu hversu lítill munur er á framfærslu sem fólki er ætlað að lifa á annars vegar til skamms tíma og hins vegar til lengri tíma.

Heilbrigðiskostnaður stórlega vanmetinn.

 

Kjör öryrkja langt undir neysluviðmiðum velferðarráðuneytis

Þegar einstakir kostnaðarliðir neysluviðmiðanna eru skoðaðir kemur í ljós að heilbrigðiskostnaður, sem snertir öryrkja og sjúklinga sérstaklega, er stórlega vanmetinn. Í rannsókn sem framkvæmd var 2006 af Rúnari Vilhjálmssyni félagsfræðingi kom fram að öryrkjar vörðu um 6% af heildartekjum heimilisins í heilbrigðismál, en í nýju neysluviðmiði velferðarráðuneytisins er hlutfallið mun lægra eða um 2,6% þrátt fyrir að kostnaðarhlutdeild sjúklinga vegna lyfja, lækniskostnaðar, þjálfunar og hjálpartækja hafi aukist umtalsvert eftir bankahrun. Almennt er talið að öryrkjar þurfi 15-30% hærri tekjur en aðrir til að njóta sömu lífskjara, þar sem heilbrigðiskostnaður er meiri hjá þeim en hjá fólki almennt séð vegna heilsubrests og kostnaðar við ýmsa aðkeypta þjónustu.

 

Aðrir vanmetnir kostnaðarliðir.

 Gagnrýna má jafnframt að í neysluviðmiðunum er ekki gert ráð fyrir kostnaði við stofnun heimilis eða flutning í annað húsnæði. Þá eru greiðslur opinberra gjalda ekki meðtalin né nefskattar og ekki er gert ráð fyrir að fólk leggi fjármagn til hliðar til að geta mætt óvæntum útgjöldum. Ljóst er að ekkert má út af bera hjá fólki með lágar tekjur til að fjárhagurinn fari ekki enn frekar úr skorðum.

 

Fátækt og félagslegar aðstæður öryrkja.

 Rannsóknin ?Fátækt og félagslegar aðstæður öryrkja? sem kynnt var 25. febrúar sl. sýnir að örorkubætur eru svo lágar að margir öryrkjar búa ekki við mannsæmandi kjör. Rannsóknin var unnin af Rannsóknasetri í fötlunarfræðum við Háskóla Íslands í samstarfi við ÖBÍ með styrk úr sjóði sem stofnaður var í tengslum við Evrópuár 2010 sem tileinkað var baráttunni gegn fátækt og félagslegri einangrun. Sjóðurinn var fjármagnaður af stjórnvöldum og Evrópusambandinu.

Í rannsókninni kemur fram að fjölskyldur með börn og unglinga á framfæri eru verst staddar fjárhagslega og þá sérstaklega einstæðir foreldrar. Jafnframt eru margir öryrkjar sem búa einir illa staddir. Í þessum hópum er fólk sem á ekki fyrir brýnustu nauðsynjum seinni hluta mánaðarins og allt of margir verða að leita til hjálparstofnana eftir matargjöfum og annarri aðstoð. Fólk sem býr við slíkar aðstæður upplifir mikla streitu, kvíða og áhyggjur af afkomu sinni. Þá telur fólk bótakerfið flókið og tekjutengingar hamla breytingum á fjárhagslegri stöðu þeirra sem eru einungis með bætur almannatrygginga eða lágar lífeyrissjóðssgreiðslur.

 Velferðarráðherra á hrós skilið fyrir að birta niðurstöður neysluviðmiðs en hingað til hefur hvílt yfir þessum málum ákveðin leynd. Nú blasir raunveruleikinn við sem hagsmunasamtök, einstaklingar og sérfræðingar hafa ítrekað bent á. Langtímafátækt er staðreynd í okkar samfélagi. Beðið er með óþreyju eftir aðgerðum stjórnvalda sem verða að bæta kjör öryrkja í anda velferðarsamfélags sem hefur mannréttindi að leiðarljósi

 

innsett F.S.

Um 62% fólks með örorkumat hefur innan við 200 þúsund krónur á mánuði til ráðstöfunar.

af:  http://www.obi.is/um-obi/frettir/nr/665

22.12.2010  

Stöð2 sýndi í gær, 21. desember, nýja hlið á kjörum öryrkja, sem er að hluta nær staðreyndum, enn er þó framsetningin villandi.

Í frétt þeirra segir meðal annars að tölurnar sýni það sem menn fá í vasann, „?eina sem getur bæst við eru húsaleiga, barna- og vaxtabætur, rétt eins og hjá fólki á vinnu markaði."

ÖBÍ hefur áræðanlegar upplýsingar um að inn í þeim uppgefnum tölum frá TR sem Stöð2 styðst við, séu einnig meðtaldar greiðslur meðlags, mæðralauna, dánarbóta, umönnunarbóta og annarra uppbóta sem fámennur hópur einstaklinga á rétt á vegna sérstakra aðstæðna.

Meðlag, mæðralaun, umönnunarbætur og dánarbætur er greiðslur sem allir almennir launamenn eiga rétt á ef þeir eru í slíkri stöðu. Þessar tölur þyrfti því að aðgreina í umræddu dæmi Stöðvar2.

Í frétt Stöðvar2 er þess einnig getið að 757 öryrkjar fari yfir 350 þúsund í ráðstöfunartekjur á mánuð (þ.e. tekjur eftir skatta). ÖBÍ vill benda á að allir þeir öryrkjar sem hafa í launa-, lífeyris- eða fjármagnstekjur kr. 331.778 (fyrir skatta) eða hærri, fá enga bætur almannatrygginga frá TR þar sem tekjutengingaráhrif hafa þá skert bætur lífeyrisþegans niður í núll. Þeir 757 öryrkjar sem tilgreindir eru í fréttinni sem hátekjumenn greiða því skatta og skyldur jafnt á við aðra launamenn í landinu. Sá fjöldi sem er í þessari stöðu mun vera hærri eða um 900 manns, samkvæmt nýlegum upplýsingum TR til ÖBÍ.

TR skjal -skerðingaráhrif tekna á bætur (opnast í nýjum vafra)

Fjármagnstekjur og skerðingar.

Loks má geta þess að allir öryrkjar sem fá fjármagnstekjur (vexti, verðbætur) af sínum bankareikningi greiða sömu skatta og aðrir þegnar þessa lands. Einnig eru bætur þeirra skertar vegna þessara tekna krónu á móti krónu, ef þeir fá uppbót á framfærslu (á við þá sem lægstu bæturnar hafa). Launamenn verða hinsvegar ekki fyrir því að laun þeirra séu skert þó nokkrar krónur fáist í vexti á ári.

Reiknivél TR fyrir þá sem hafa áhuga á að kynna sér málin betur. (opnast í nýjum vafra)

Frétt Stöðvar2 þann 21. desember.
 

Innsett  F.S.

Notendastýrð persónuleg aðstoð og kostnaður við þjónustu við aldraða og fatlaða

 

10.12.2010

http://www.obi.is/um-obi/frettir/nr/660

 

Skýrsla Hagfræðistofnunar Háskóla Íslands, unnin fyrir ViVe-Virkari velferð.

Í þessrai skýrslu er fjallað um notendastýrða persónulega aðstoð og tiltekin nokkur dæmi um kostnað við núverandi þjónustu við aldraða og fatlaða á Íslandi. Að skýrslunni unnu Dr. Sveinn Aganrsson frostöðumaður Hagfræðistonfunar HÍ og Þorvarður Atli Þórsson hagfræðingu.

Vive er vinnuhópur sem hefur tekið saman áætlun fyrir íslens stjornvöld um hvernig hægt er að breyta velferðarkerfi þannig ða fatlaðir og aldraðir geti lifað sjálfstæðu lífi utan stofnana.

Skýrslan í heild (767kb)

 

 innsett F.S.

 

Viljayfirlýsingu um að koma í veg fyrir víxlverkanir örorkubóta og lífeyrissjóðstekna öryrkja.

 

 

Víxlverkanir stöðvaðar   

http://www.obi.is/um-obi/frettir/nr/657

8.12.2010

 

Stjórnvöld og Landssamtök lífeyrissjóða undirrituðu 3. desember sl., viljayfirlýsingu um að koma í veg fyrir víxlverkanir örorkubóta og lífeyrissjóðstekna öryrkja.

Stjórnvöld og Landssamtök lífeyrissjóða undirrituðu í dag viljayfirlýsingu um að koma í veg fyrir víxlverkanir örorkubóta og lífeyrissjóðstekna öryrkja. Fyrir hönd lífeyrissjóðanna er viljayfirlýsingin undirrituð með fyrirvara. Á heimasíðu Landssambands lífeyrissjóða er á það bent að hver og einn lífeyrissjóður eigi að sjálfsögðu síðasta orðið um aðild sína að samkomulaginu. Einnig segir að formsatriðum samkomulagsins skuli ljúka fyrir miðjan desember og að því búnu taki hver lífeyrissjóður afstöðu til málsins.

 

Víxlverkanirnar hafa ítrekað skert bætur öryrkja.

Á vef ráðuneytisins er viðurkennt að víxlverkanirnar hafa komið öryrkjum illa og staðið í vegi fyrir kjarabótum þeim til handa. Lífeyrissjóðirnir hafa síðustu misserin miðað greiðslur sínar til öryrkja við tekjur þeirra áður en þeir urðu fyrir örorku. Þetta hefur leitt til þess að þegar stjórnvöld hafa hækkað bætur til öryrkja hafa greiðslur lífeyrissjóðanna lækkað að sama skapi. Tekjutengingin milli almannatrygginga og lífeyrissjóða er gagnkvæm. Aðgerðir stjórnvalda til að bæta kjör öryrkja hafa því litlu skilað til þessa hóps og sömuleiðis hafa hærri greiðslur úr lífeyrissjóðum leitt til lækkunar örorkubóta.

 

Aftenging víxlverkunarinnar mun gilda í 3 ár.

Viljayfirlýsingin felur í sér að víxlverkanir milli örorkubóta almannatrygginga og lífeyrissjóðstekna verða aftengdar í þrjú ár (árin 2011, 2012, 2013). Áhrif atvinnutekna öryrkja á bætur og greiðslur úr lífeyrissjóðum verða hins vegar óbreytt. Aðilar eru sammála um að nota þennan tíma til að finna lausn á fyrirkomulagi þessara mála til framtíðar. Samhliða mun fara fram endurskoðun á tekjutengingu ýmissa bótaflokka almannatrygginga.

 

Viljayfirlýsingin (opnast á heimasíðu Landssambands lífeyrissjóða)

 

Frétt um undirskrift viljayfirlýsingarinnará heimasíðu Landssambands lífeyrisjóða 

 

Frétt um undirskrift viljayfirlýsingarinnar á heimasíðu félags og tryggingamálaráðuneytis

 

innsett F:S:

Umsögn ÖBÍ um frumvarp um breytingar á lögum um málefni fatlaðra.........

                                                                                                                                                                             

 

Nefndasvið Alþingis

Austurstræti 8-10

150 Reykjavík

 

 

 

                                                                                                  Reykjavík, 2. desember 2010

 

 

 

Efni: Umsögn Öryrkjabandalags Íslands um frumvarp til laga um breytingu á lögum nr. 59/1992, um málefni fatlaðra, með síðari breytingum.

 

Öryrkjabandalag Íslands (ÖBÍ) hefur fengið til umsagnar frumvarp til laga um breytingu á lögum nr. 59/1992, um málefni fatlaðra, með síðari breytingum.

 

Eins og aðalstjórn ÖBÍ ályktaði 22. júní 2010 telur ÖBÍ að til að yfirfærslan geti farið fram svo sómi sé að verði lagaumhverfi að vera komið á hreint. Íslendingar skrifuðu undir Samning Sameinuðu þjóðanna (SÞ) um réttindi fólks með fötlun 30. mars 2007 og ætti að vera búið að innleiða samninginn nú þegar. Ljóst er að endurskoðun þeirra laga sem hér eru til umfjöllunar var framkvæmd til að hægt væri að færa málefni fatlaðs fólks frá ríki til sveitarfélaga, það er að færa málaflokkinn á milli stjórnsýslustiga. Ekki er um heildarendurskoðun að ræða og Samningur SÞ er ekki hafður að leiðarljósi. Hefja þarf því tafarlaust vinnu við að semja ný lög um réttindi fatlaðs fólks sem byggja meðal annars á þörfum einstaklingsins og rétti hans til fullrar samfélagsþátttöku.

 

Athugasemdir við einstakar greinar

Samráð við hagsmunasamtök

ÖBÍ leggur áherslu á að leggja þurfi ríkari áherslu á samráð við hagsmunasamtök fatlaðs fólks í frumvarpinu. Sem dæmi kemur fram í 2. gr. laganna, 1. mgr.: „Ráðherra ber ábyrgð á opinberri stefnumótun í málefnum fatlaðra sem skal gerð í samvinnu við Samband íslenskra sveitarfélaga." Hér þarf að bæta inn í lok setningarinnar orðin: „og hagsmunasamtök fatlaðs fólks."

 

Trúnaðarmenn, réttindagæsla og samráð við notendur

Í 26. gr. frumvarpsins er fjallað um trúnaðarmenn fatlaðra. ÖBÍ telur að hér þurfi að koma fram fjöldi trúnaðarmanna og að haft verði samráð við hagsmunasamtök fatlaðs fólks um það atriði. ÖBÍ telur að lágmark einn trúnaðarmaður verði að vera starfandi í hverri þjónustumiðstöð til að tryggja nærþjónustu við fatlað fólk.

 

Fjallað er um ferli mála sem koma til trúnaðarmanns í 26. gr. lið b. Kemur þar fram að trúnaðarmaður aðstoði hinn fatlaða við að kæra mál til úrskurðarnefndar um félagsþjónustu og húsnæðismál þegar það á við, sbr. 3. mgr. 5. gr. og meti hvort hann tilkynni um málið til velferðarráðuneytis. ÖBÍ vill benda á að hér ætti að breyta lok setningarinnar þannig að trúnaðarmaður meti í samráði við hinn fatlaða hvort málið verði tilkynnt til velferðarráðuneytis.

 

Í 8. gr. frumvarpsins lið b. kemur fram að sveitarfélagi eða sveitarfélögum sem starfa saman á þjónustusvæði sé heimilt að bæta við þjónustustofnunum, sameina þær eða fella niður starfsemi þeirra. Þarna eru sveitarfélögin í mikilli valdastöðu og geta fellt niður þjónustu án þess að hafa samráð við hlutaðeigendur. ÖBÍ telur þetta ákvæði of einhliða og að bæta þurfi við að sveitarfélögin verði að hafa fullt samráð við notendur þjónustunnar í tilvikum sem þessum.

 

Réttindagæslu fatlaðs fólks er ekki getið í frumvarpinu og finnst ÖBÍ það miður í ljósi nýútkominnar skýrslu frá Ríkisendurskoðun um þjónustu við fatlaða þar sem fram kemur að eftirlit með þjónustu við fatlaða sé óviðunandi. ÖBÍ telur nauðsynlegt að endurskoðuð lög um réttindagæslu líti dagsins ljós áður en málaflokkurinn færist yfir.

 

Eftirlit og gæðakröfur

Samkvæmt 7. gr. frumvarpsins er sveitarfélagi eða sveitarfélögum sem standa saman að þjónustusvæði heimilt að veita starfsleyfi til handa félagasamtökum, sjálfseignarstofnunum eða öðrum einkaaðilum sem vilja hefja eða taka við rekstri þjónustustofnunar. Hvergi kemur fram hvaða kröfur ætti að gera til slíkra aðila og hvernig eftirliti með þeim skuli háttað. Í 2. og 3. gr. kemur fram að ráðherra skuli hafa eftirlit með framkvæmd  laganna og þar með talið þjónustu og starfsemi innan málaflokksins og að sveitarfélög skuli hafa innra eftirlit með framkvæmd þjónustunnar. ÖBÍ telur að kveða þurfi nánar á um þessi atriði í frumvarpinu. Innra eftirlit gengur ekki upp nema með sterku ytra eftirliti. Einnig gerir ÖBÍ kröfu um að áætlað eftirlit velferðarráðuneytisins með þjónustu sveitarfélaganna verði virkt og að fram komi í frumvarpinu hvernig standa eigi að því.

 

Aðstoð við fatlað fólk

Í 9. gr. frumvarpsins segir að fatlaðir skuli eiga kost á þeirri félagslegu þjónustu sem gerir þeim kleift að búa á eigin heimili og húsnæðisúrræðum í samræmi við þarfir þeirra og óskir eftir því sem kostur er. Hér er eingöngu verið að fjalla um þjónustu á eigin heimili en ekkert er kveðið á um aðstoð til samfélagsþátttöku. ÖBÍ telur nauðsynlegt að víkka þessa grein út þannig að fatlað fólk geti fengið aðstoð á öllum sviðum samfélagsins, sem dæmi má nefna í skóla, vinnu, frítíma, sem er í anda hugmyndafræði notendastýrðrar persónulegrar aðstoðar, sem nánar er fjallað um í næsta kafla.

 

Samkvæmt 4. gr. frumvarpsins á að hafa samráð við hinn fatlaða og væntanlegt sambýlisfólk hans óski hann eftir þjónustu sem rekin er af öðrum en sveitarfélögum. Hér ætti að bæta við að það sé gert þegar það á við. Það býr ekki allt fatlað fólk á sambýlum.

 

Í frumvarpinu er hvergi getið um lengda viðveru fyrir fatlað fólk á grunn- og framhaldsskólaaldri. ÖBÍ vill benda á að taka þurfi tillit til sérþarfa þess hóps barna og ungmenna sem geta í mörgum tilvikum ekki verið ein heima eftir að skóla lýkur þar sem þau þurfa á mikilli aðstoð að halda, vegna fötlunar sinnar, hreyfihömlunar, blindu, heyrnarskerðingar og börn sem eru með langvarandi veikindi.

 

ÖBÍ telur að þess þurfi að geta í frumvarpinu að fjármagn skuli fylgja einstaklingnum við flutning á milli sveitarfélaga og að hann fái þjónustu frá fyrsta degi. Jöfnunarsjóður á að sjá um að svo sé en að mati ÖBÍ er nauðsynlegt að lögfesta þetta atriði.

 

Notendastýrð persónuleg aðstoð (NPA)

Í 33. gr. frumvarpsins er fjallað um NPA og að koma skuli á sérstöku samstarfsverkefni ríkis, sveitarfélaga og heildarsamtaka fatlaðs fólks í þessu sambandi. Í fyrri drögum frumvarpsins var tekið fram að verkefnið ætti að hefjast við gildistöku laganna, en þessi setning hefur nú verið felld niður. ÖBÍ fer fram á að sett verði aftur inn ákvæði í lögin um tímasetningu verkefnisins.

 

Samkvæmt 4. málsgrein sömu greinar er fjallað um verðmat og notendasamninga í tengslum við NPA. ÖBÍ telur að hér ætti að koma fram að tryggja verði að notandi lendi ekki í aukakostnaði vegna þess að verðmat á aðstoð sé of lágt eða þörf á þjónustu vanmetin.

 

Kærufrestur vegna ákvarðana um þjónustu

Samkvæmt 5. gr. frumvarpsins er fötluðu fólki heimilt að kæra stjórnvaldsákvarðanir um þjónustu sem teknar séu á grundvelli laga þessa til úrskurðarnefndar félagsþjónustu og húsnæðismála. Fram kemur að kærufrestur sé fjórar vikur frá því að tilkynning berst um ákvörðunina. Í stjórnsýslulögum nr. 37 frá 30. apríl 1993 í 27. gr. kemur fram að kæra skuli borin fram innan þriggja mánaða frá því að aðila máls var tilkynnt um stjórnvaldsákvörðun. Nauðsynlegt er að taka tillit til þess að fólk þarf undirbúning til að leggja fram kæru, sérstaklega þegar haft er í huga að sumir þurfa að leita sér aðstoðar við það. ÖBÍ telur að í frumvarpi þessu ætti að taka mið af ákvæðum í stjórnsýslulögum og lengja kærufrestinn í þrjá mánuði að lágmarki.

 

Ferðaþjónusta fatlaðra

Í 24. gr. frumvarpsins er fjallað um ferðaþjónustu fatlaðra en þeirri þjónustu hefur að mati notenda í mörgu verið ábótavant. Samræming hefur ekki verið á milli sveitarfélaga, dæmi eru um að notendur hafi ekki getað ferðast á milli sveitarfélaga með ferðaþjónustunni, sem er mjög bagalegt. Einnig hefur fólk ekki getað nýtt sér þessa þjónustu í öðrum sveitarfélögum en þar sem það hefur lögheimili. ÖBÍ telur að taka þurfi tillit til þessa þegar ráðherra gefur út leiðbeinandi reglur fyrir sveitarfélögin um rekstur ferðaþjónustu fatlaðra.

 

Samkvæmt 24. gr. er sveitarfélögum heimilt að innheimta gjald fyrir ferðaþjónustu fatlaðra. ÖBÍ vill benda á að þar sem það á við ætti gjald ekki að vera hærra en það sem ófatlað fólk greiðir fyrir almennings samgöngur á viðkomandi svæði.

 

Samráðsnefnd

Samkvæmt 34. gr. frumvarpsins skal velferðarráðherra skipa átta manna samráðsnefnd um málefni fatlaðra. Þar kemur meðal annars fram að Öryrkjabandalag Íslands skuli tilnefna einn fulltrúa. Þar sem ÖBÍ er hagsmunafélag margra stórra fötlunarhópa, eins og til dæmis hreyfihamlaðra, fólks með þroskahömlun, blindra, sjónskertra, geðfatlaðra, heyrnarskertra, heyrnarlausra og langveikra fer ÖBÍ fram á að það fái að skipa að minnsta kosti tvo fulltrúa í samráðsnefndina.

 

Framkvæmdasjóður fatlaðra

Samkvæmt 34. gr. frumvarpsins skal leggja framkvæmdasjóð fatlaðra niður 1. janúar 2011 og frá þeim tíma tekur fasteignasjóður innan Jöfnunarsjóðs sveitarfélaga við réttindum og skyldum sjóðsins í tengslum við fasteignir sem nýttar eru í þágu þjónustu við fatlaða við yfirfærsluna.

 

Í frumvarpinu er hvergi tekið fram hver á að taka við öðrum hlutverkum sjóðsins en þeim sem tengjast fasteignum. Í reglugerð um stjórnarnefnd málefna fatlaðra og Framkvæmdasjóð fatlaðra II. kafla 8. gr. kemur fram að hlutverk sjóðsins sé meðal annars eftirfarandi:

-          Veita styrki til félagasamtaka og sjálfseignarstofnana, til stofnana og heimila fatlaðra, meiri háttar viðhaldsframkvæmda o.fl.

-          Veita styrki til framkvæmdaaðila félagslegra íbúða sem ætlaðar eru til leigu.

-          Verja allt að 10% af ráðstöfunarfé til að bæta aðgengi opinberra stofnana.

-          Veita fé til breytinga á almennum vinnustöðum.

-          Veita fé til kannana og áætlana í málefnum fatlaðra.

-          Veita fé til annarra framkvæmda sem nauðsynlegar eru taldar í þágu fatlaðra.

 

Þessi atriði hafa haft mikla þýðingu fyrir fatlað fólk og hagsmunasamtök þeirra sem hafa getað sótt í þennan sjóð til að viðhalda húsnæði og vinna að bættu aðgengi fyrir fatlað fólk. ÖBÍ telur nauðsynlegt að fram komi í frumvarpinu hver tekur við þessum hlutverkum eftir yfirfærsluna. 

 

Lokaorð

Eins og fram kemur í umsögn ÖBÍ þá eru mörg atriði í frumvarpinu sem þarf að endurskoða. ÖBÍ hvetur stjórnvöld til að taka tillit til þeirra við setningu laganna með hliðsjón af Samningi SÞ um réttindi fólks með fötlun.

 

 

 

Virðingarfyllst,

f.h. Öryrkjabandalags Íslands

 

 

 

____________________________                     _______________________

Guðmundur Magnússon                                       Lilja Þorgeirsdóttir

formaður ÖBÍ                                                            framkvæmdastjóri ÖBÍ

 

innsett: F.S.

 

 

 

 

Umsögn um drög að skýrslu vinnuhóps um nýtt greiðsluþátttökukerfi vegna lyfjakostnaðar.

 Af:  OBI.is

 

 

Heilbrigðisráðuneytið

b.t. Ingunnar Björnsdóttur

Vegmúla 3

150 Reykjavík

 

 

Reykjavík, 12. nóvember 2010

 

 

Efni: Umsögn um drög að skýrslu vinnuhóps um nýtt greiðsluþátttökukerfi vegna lyfjakostnaðar. 

 

Öryrkjabandalag Íslands (ÖBÍ) hefur fengið til umsagnar drög að skýrslu vinnuhóps um nýtt greiðsluþátttökukerfi sjúkratrygginga vegna lyfjakostnaðar frá október 2010. Frestur til að skila umsögninni er til mánudagsins 15. nóvember.

 

Inngangur

ÖBÍ fagnar því að drög að skýrslu vinnuhóps um nýtt greiðsluþátttökukerfi séu komin út, sem boðar breytingu á núverandi kerfi. Miðað við framkomnar tillögur verður kerfið mun einfaldara en það er í dag og er von okkar að kerfisbreytingin verði sem allra fyrst. Ánægjulegt er að sjá að sérstakt viðmið verði fyrir elli- og örorkulífeyrisþega eins og fram kemur í tillögum 1 og 2. Tillaga 3 kemur ekki til greina að okkar mati.

 

Breytingin sem boðuð er á kerfinu í heild sinni er jákvæð. Mikilvægt er að greiðsla fylgi sjúklingum en ekki lyfjum, þannig að aukið jafnræði ríki meðal fólks, óháð sjúkdómum. Einnig er mikilvægt að hámark greiðsluþátttöku einstaklinga sé skilgreint og að hægt sé að sækja um lyfjaskírteini þegar því hámarki er náð. Við fögnum því að sýklalyf verði tekin með inn í greiðsluþátttökukerfið, því sýkingar eru oft aukaverkanir ýmissa sjúkdóma. Nauðsynleg lyf vegna aukaverkana, t.d. magalyf, sem fylgja oft langvarandi notkun annarra lyfja eða notkun eldri og ódýrari lyfja þarf einnig að taka inn í kerfið.

 

ÖBÍ vill þó benda á að ekki er ráðgert að setja aukið fjármagn inn í nýtt kerfi heldur munu fjölmargir sjúklingar greiða meira en áður fyrir lyf sín til að fjármagna aukna niðurgreiðslu hjá öðrum sjúklingum. Slíkt fyrirkomulag kemur sér vel fyrir þá sem eru með verulegan lyfjakostnað þar sem ekkert þak er á því hversu hár lyfjakostnaður getur orðið. En fyrirhuguð breyting kemur niður á þeim sjúklingum sem í dag greiða lægra gjald.

 

Vert er að benda á að margir sjúklingar þurfa ýmis hjálpartæki sem fylgja lyfjatöku og kostnaði því samfara. Sá kostnaður telst ekki vera vegna lyfja heldur sem hjálpartæki. ÖBÍ leggur áherslu á að sá kostnaður verði skoðaður samhliða breytingu á kerfinu þar sem útgjöld vegna lyfja er aðeins hluti af þeim kostnaði sem sjúklingar verða fyrir. Nauðsynlegt er að fá heildarsýn yfir stöðu mála. 

 

 

Athugasemdir við ýmis atriði skýrslunnar

Mjög gott er að tekið verður á fjöllyfjanotkun skv. skýrslunni. Hins vegar þarf að huga að því að þegar fólk greinist með sjúkdóma hefst, í mörgum tilvikum, leitun að rétta lyfinu þar sem að hagkvæmustu lyfin henta ekki öllum. ÖBÍ leggur áherslu á að heimild til notkunar annarra lyfja sé virt, m.a. vegna aukaverkana og öryggis, því er sveigjanleiki lyfjaskírteina nauðsynlegur. Þegar lyf eru tekin fyrirvaralaust úr greiðsluþátttöku þurfa að vera skýr og gegnsæ rök fyrir því sem öllum eru aðgengileg. Eins og áður sagði virka sum lyf betur en önnur fyrir ákveðna einstaklinga og því er það alvarlegt mál að taka lyf fyrirvaralaust út.

 

Í skýrslu vinnuhópsins er talað um kostnaðarvitund sjúklinga og hvatann til að velja ódýrari lyf sem getur í mörgum tilvikum verið jákvætt. En bent er á að margir sjúklingar hafa ekkert val og taka þarf sérstaklega tillit til þess hóps hvað kostnaðarþátttöku varðar við breytingu á kerfinu.

 

Við upphaf lyfjameðferðar hafa lyf oft verið afgreidd í mjög stórum skömmtum þrátt fyrir að ekki sé vitað hvort lyfið henti viðkomandi eða ekki. Ef í ljós kemur að viðkomandi lyf hentar ekki þá fer hugsanlega rúmlega helmingur lyfsins í ruslið. Huga ætti að því að veita meira svigrúm varðandi stærðir lyfjaskammta svo hægt sé að afgreiða minna af fyrsta skammti af nýju lyfi. Með því móti má spara töluvert fjármagn sem annars færi til spillis.

 

Í skýrslunni eru taldir upp þeir aðilar sem halda þarf fundi með. Ánægjulegt er að sjá Öryrkjabandalagið þar upp talið en það gleymist að félög sjúklinga hafa hagsmuna að gæta og ættu að vera sjálfsagður markhópur kynningar. Veitendur þjónustunnar eiga að upplýsa sjúklinga um fyrirhugaðar breytingar. Hingað til hefur upplýsingaflæði til sjúklinga ekki verið nógu gott og mætti bæta, m.a. er heimasíða Sjúkratrygginga helst til flókin.

 

Sá gagnagrunnur sem notaður verður til að halda utan um upplýsingar þarf að vera mjög vel varinn og ekki ætlaður til að setja inn aðrar upplýsingar en upphaflegur tilgangur segir til um. Fólk ætti að geta farið inn á sína eigin lyfjagátt á sama hátt og farið er inn í heimabanka eða síður ríkisskattstjóra og geta fylgst með eigin upplýsingum ásamt upplýsingum um kostnað og lyf.

 

Úttekt og eftirlit

Mikilvægt er að gerð verði úttekt á kerfinu svo hægt sé að gera sér grein fyrir virkni þess. Úttekt þarf að gera þegar kerfið er sett upp og aftur að ári liðnu. Sú úttekt ætti ekki að vera eingöngu á hendi landlæknisembættisins, því það embætti er fulltrúi kerfisins. Sjúklingar ættu einnig að hafa sinn fulltrúa í eftirliti með kerfinu, sbr. Samning Sameinuðu þjóðanna um réttindi fólks með fötlun. Búa þyrfti til embætti umboðsmanns sjúklinga eins og gert hefur verið á norðurlöndum.

 

Lokaorð

ÖBÍ lítur á þessar breytingar sem fyrsta skrefið í átt að jafnræði. Með fyrirhuguðum breytingum verður kerfið markvissara og gagnast frekar þeim sem þurfa mest á þjónustunni að halda.

 

ÖBÍ leggur áherslu á að í framhaldi af þessu þarf að skoða sem allra fyrst greiðsluþátttöku sjúklinga í hjálpartækjum, læknisheimsóknum, sjúkra-, iðju- og talþjálfun ásamt tannlæknakostnaði. Lyfjakostnaður er einungis hluti af þeim kostnaði sem öryrkjar og langveikir þurfa að greiða vegna sinnar fötlunar og/eða sjúkdóma.

 

Rétt er að ítreka það að tillögur nefndarinnar um nýtt greiðsluþátttökukerfi byggja á hagræðingu innan sjálfs kerfisins, þannig að niðurgreiðslur á lyfjum koma frá sjúklingunum sjálfum þar sem ekkert aukafjármagn kemur til af hendi ríkisins. Eðlilegra væri að laga kerfið og auka jafnræði með öðrum hætti með allt samfélagið í huga þ.e. í gegnum skattkerfið. Með því móti væri hægt að halda lyfjakostnaði sjúklinga í lágmarki.

 

Virðingarfyllst,

f.h. Öryrkjabandalags Íslands

 

________________________

Guðmundur Magnússon

formaður

 

 innsett/F.S.

 

Greytt fyrir táknmálstúlkun viðskiptavina Tryggin

 

 

Oft er spurt til hvers eru öll þessi sjúklingafélög?? Þau gera ekki neitt hvort sem er.

Hér hefur Félag heirnarlausra náð að tryggja heyrnarlausu fólki ókeypis táknmálstúlk þegar það fer í viðtal í TR.

Öll réttindi sem fólk hefur eru tilkomin vegna baráttu og réttindunum verður einungis viðhaldið með því að vera á var...ðbergi og berjast fyrir réttindunum þegar þess þarf.

Sjúklingafélög eru nauðsinleg m.a. til svona réttindagæslu.

 Ég óska Félagi Heyrnarlausra til hamingju með árangurinn.

Ritað/Innsett  F.S.

Greitt fyrir táknmálstúlkun

Endalok velferðarkerfisins?

Af: http://www.obi.is/um-obi/frettir/nr/624

 12.10.2010

 Öryrkjar hafa fengið meira en nóg! Staða örorkulífeyrisþega hefur versnað til muna í kreppunni segir m.a. í grein formanns ÖBÍ og framkvæmdastjóra ÖBÍ sem birtist í Morgunblaðinu 11. október.

 

Öryrkjar hafa fengið meira en nóg!

 Fjárlagafrumvarpið sem nú liggur fyrir er mikið reiðarslag fyrir fjölda öryrkja og ellilífeyrisþega, en þar er gert ráð fyrir enn meiri skerðingum en orðið er. Slík aðgerð er ekki í anda þeirrar ríkisstjórnar sem kjörin var í síðustu kosningum með fyrirheit um að verja velferðarkerfið. Þau loforð hafa engan veginn staðist.

Staða örorkulífeyrisþega hefur versnað til muna í kreppunni. Frá því í janúar 2009 hafa umtalsverðar tekjuskerðingar átt sér stað í almannatryggingakerfinu. Breytingar hafa verið gerðar á lögum og reglugerðum ásamt túlkun og framkvæmd þeirra, sem hafa komið illa niður á öryrkjum og sjúklingum. Mörg mál sem koma inn á borð ráðgjafa Öryrkjabandalags Íslands (ÖBÍ) eru mjög erfið viðureignar, því kerfið er mun flóknara en áður og fólk nær ekki að framfleyta sér á lágum bótum, á sama tíma og útgjöld hafa aukist í heilbrigðiskerfinu. Fólk talar um verulega skert lífsgæði og vanlíðan sem þessu fylgir.

Svo virðist sem öryrkjar séu sá hópur sem eigi að rétta af gjaldþrot þjóðarbúsins, á sama tíma og milljarðar eru afskrifaðir í íslenska bankakerfinu, hjá ráðamönnum og öðrum tengdum aðilum, er njóta forgangs í íslensku samfélagi.

 

Lífsnauðsynleg leiðrétting

Í frumvarpinu er ekki gert ráð fyrir neinum leiðréttingum á greiðslum almannatrygginga um næstu áramót annað árið í röð. Um lífsviðurværi fólks er að ræða sem þarf að treysta á velferðarkerfið vegna örorku eða langvarandi veikinda. Mikil vonbrigði eru fólgin í því að stjórnvöld brjóti lög sem sett voru til að lífeyrir fylgdi verðlagi.

ÖBÍ krefst þess að stjórnvöld hækki bætur almannatrygginga um að lágmarki 18-20% en með því væri lögum framfylgt. Bætur almannatrygginga hafa ekki hækkað frá 1. janúar 2009, þegar þær hækkuðu hjá flestum um tæplega 10% en hefðu átt að hækka um nær 20%. Þann 1. janúar sl. voru bætur frystar og í fjárlagafrumvarpinu sem nú liggur fyrir er ekki gert ráð fyrir neinum leiðréttingum á kjörum öryrkja þrátt fyrir að vísitala neysluverðs hafi hækkað um 28% frá því í janúar 2008 til ágúst 2010. Því er alveg ljóst að kjör öryrkja eru langt undir fátæktarmörkum sé miðað við skilgreiningu á hugtakinu fátækt innan Evrópusambandsins.

 

Skerðingar á bótaflokkum

Greiðslur sem lífeyrisþegar fá úr almannatryggingakerfinu eru 153.400 kr. fyrir skatt fyrir þá sem búa með öðrum og 180.000 kr. fyrir þá sem búa einir. Eins og gefur að skilja, þá duga slíkar bætur engan veginn í þeirri kreppu sem nú ríkir. Hluti af þessum greiðslum er bótaflokkur sem heitir „sérstök uppbót til framfærslu" sem er án frítekjumarks þannig að aðrar bætur skerða bótaflokkinn krónu á móti krónu. Jafnvel þeir öryrkjar sem fá bensínstyrk vegna hreyfihömlunar lenda í slíkum skerðingum. Ein undantekning er þó á þessari reglu, sem tók gildi 1. júlí sl., eftir mikinn þrýsting frá ÖBÍ, en það er sérstök uppbót vegna mikils lyfja- og lækniskostnaðar. Nauðsynlegt er að undanskilja fleiri bótaflokka sem fólk fær vegna mikils kostnaðar sem hlýst af fötlun eða sjúkdómum. ÖBÍ hefur margsinnis bent á nauðsyn þess að breyta skerðingarákvæðum bótaflokksins sem var komið á rétt fyrir bankahrun en hann heldur fólki í viðjum fátæktar.

 

Óréttlátar tekjutengingar

Vert er að minnast þess mikla áfalls þegar lög um ráðstafanir í ríkisfjármálum tóku gildi þann 1. júlí 2009. Lögin höfðu víðtækar afleiðingar í för með sér fyrir fjölda öryrkja og ellilífeyrisþega sem urðu fyrir talsverðum skerðingum á bótum almannatrygginga með aðeins tveggja daga fyrirvara. Tekjutengingar jukust þannig að bætur skertust meira og fyrr en áður. Nýmæli tóku einnig gildi þegar lífeyrissjóðstekjur tóku að skerða „grunnlífeyri" og einnig bótaflokkinn „aldurstengd örorkuuppbót". Breytingin leiddi til þess að margt fólk missti ákveðin réttindi sem þeim bótaflokkum fylgdu s.s. niðurgreiðslu á sjúkraþjálfun, tannlæknakostnaði, iðjuþjálfun o.fl. ÖBÍ mótmælti harðlega þessum aðgerðum en stór hópur lífeyrisþega varð fyrir skerðingum, sem í sumum tilvikum voru hlutfallslega hærri en hátekjuskatturinn sem síðar var lagður á launþega með yfir 700.000 kr. í tekjur á mánuði.

 

Aukin greiðsluþátttaka sjúklinga

Aukin greiðsluþátttaka sjúklinga í heilbrigðiskerfinu hefur einnig komið niður á öryrkjum og sjúklingum. Sem dæmi þá var reglum um kostnaðarþátttöku sjúklinga í sjúkra-, iðju- og talþjálfun breytt 1. október 2009, sem jók kostnað sjúklinga enn frekar. Jafnframt eru dæmi þess að fólk geti ekki keypt nauðsynleg hjálpartæki, þar sem kostnaðarhlutdeild sjúklinga miðast við ákveðna prósentu af kaupverði sem hefur hækkað verulega vegna gengishrunsins. Í sumum tilvikum greiðir Tryggingastofnun ríkisins ákveðna upphæð í hjálpartækjum, sem hefur ekki breyst þrátt fyrir miklar verðhækkanir og eru heyrnartæki dæmi um slíkt. Hækkunin lendir á þeim sem þurfa að nota tækin.

 

Skerðingar lífeyrissjóðanna

Til viðbótar við þær skerðingar sem stjórnvöld hafa komið á hafa öryrkjar og ellilífeyrisþegar orðið fyrir skerðingum hjá mörgum lífeyrissjóðum í kjölfar kreppunnar sem eru á bilinu 7-19%. Þessu til viðbótar hafa margir lífeyrissjóðir skert bætur öryrkja sérstaklega frá árinu 2006 þrátt fyrir hörð mótmæli ÖBÍ. Þeir lífeyrissjóðir sem um ræðir tóku mið af greiðslum almannatrygginga við útreikning bóta sem hefur leitt til þess að þær hafa lækkað umtalsvert. Lægri lífeyrissjóðsgreiðslur geta leitt til þess að fólk fái hærri greiðslur úr almannatryggingakerfinu, en einungis að litlum hluta, sem síðar leiðir til þess að lífeyrissjóðsgreiðslur skerðast enn frekar. Víxlverkunin hefur leitt til þess að lífeyrissjóðsgreiðslur hafa fallið niður hjá mörgum. Skerðingin hefur bitnað mest á þeim öryrkjum sem hafa lægstu tekjurnar og hefur að auki haft aukinn kostnað í för með sér fyrir ríkissjóð. Til að sporna við þessu rak ÖBÍ prófmál gegn lífeyrissjóðnum Gildi. Málið fór fyrir Héraðsdóm og vannst sigur í málinu. Gildi áfrýjaði til Hæstaréttar sem úrskurðaði lífeyrissjóðnum í vil. Það voru mikil vonbrigði, enda varðar þessi niðurstaða fjölda öryrkja sem bíða eftir því að fá leiðréttingu sinna mála. ÖBÍ hefur ákveðið að fara með málið til Mannréttindadómstóls Evrópu og hefur umsókn verið send með ósk um að málið verði tekið fyrir. ÖBÍ hefur ítrekað bent stjórnvöldum á það óréttlæti sem í þessu felst og á erfitt með að skilja ástæðu þess að ekki sé búið að setja lög sem kveða á um ólögmæti slíkra skerðinga. Í fjárlagafrumvarpinu sem nú liggur fyrir kemur fram að ráðgert er að samkomulag náist við lífeyrissjóðina um að þeir líti ekki til bóta almannatrygginga við samanburð á tekjum öryrkja. Reynslan sýnir að taka beri slíkar yfirlýsingar með fyrirvara.

 

Erfið staða öryrkja

Eins og gefur að skilja eru mál þeirra sem leita til ráðgjafa ÖBÍ mun erfiðari nú en áður. Öryrkjar, sem margir hverjir bjuggu við kröpp kjör í góðærinu, eiga ekki fyrir mat eða öðrum nauðsynjum þegar föst gjöld eins og lán og/eða húsaleiga hefur verið greidd. Greinilegt er að stjórnvöld skortir heildarsýn og skilning á aðstæðum öryrkja.

ÖBÍ fer fram á það við stjórnvöld að breytingar verði tafarlaust gerðar á fjárlagafrumvarpinu til hagsbóta fyrir þá sem þurfa að reiða sig á velferðarkerfið. Slíkar skerðingar á kjörum fólks koma alltaf verst niður á þeim sem síst skyldi. Það er mikil áhætta fólgin í því að hópur fólks lifi við sára fátækt sökum fötlunar eða heilsubrests. Slíkur ráðahagur getur leitt til samfélagslegs tjóns sem verður ekki bætt. Það má öllum vera ljóst að ekki hefur verið staðið vörð um kjör öryrkja á þessum erfiðu tímum. Það er spurning hvort endalok íslenska verferðarkerfisins séu runnin upp.

 

7. október 2010

 Guðmundur Magnússon, formaður ÖBÍ.

 Lilja Þorgeirsdóttir, framkvæmdastjóri ÖBÍ.

 innsett FS